Sumik siunertaqarpa?

Mariap oqaluttuarissavaa nammineq qanoq ililluni uumasorujuit pillugit soqutigisaqalernerminut tunuliaqutaasut, atuakkap Bestiarium Groenlandicap pilersinnera, Kalaallit Nunaanni uumasorujunnik qanoq pisaqartoqartarnera - aammalu sooq ukiup taarnerani sivisuumi qiiaammisaarnartut pingaaruteqartigisut.

Ilanngullugit oqaluttuarilaassavai Nunatsinni uumasorujuit assigiinngitsut, uumasorujuillu sorliit ullutsinni suli takuneqarsinnaasut. Oqalugiarneq naggaserlugu sivikitsumik titartaatitsisoqassaaq, meeqqat namminneq uumasorujuutertik titartarsinnaallugu allaaserisinnaalluguluunniit. 

Qallunaatut, Tuluttut, Ullut sammisaqarfiusut, Upperisarsiorneq isumalioqqissaarnerlu

Alloriarneq 1: Atuarnermi siullermi Mariap uumasorujunniarneq oqaluttuarissavaa, oqaluttuatoqqani uumasorujuit ilisimaneqarnerpaat, qanorlu atuuffeqarsimanerat pillugu. Uumasorujuit assingi takutinneqassapput, quianarsinnaasut aamma ersinarpallaanngitsut takutinneqassallutik. Atuarnermi tulliullugu meeqqat namminneq uumasorujummik titartaassapput.

Alloriarneq 2: Atuarnermi siullermi Maria uumasorujuit sumullu atuuffeqarsimanerat pillugu oqaluttuassaaq, ersinarnerulaartut - anersaat pillugit. Atuarnerup aappaani meeqqat namminneq uumasorujummik titartaassapput, tassungalu tunngasoq namminneq oqaluttuarissavaat. Klassimi amerlappata agguataarneqarsinnaapput ikinnerusunut, sunalu pitsaanerunersoq ilinniartitsisoq isumaqatigalugu.

Alloriarneq 3: Atuarnermi siullermi Mariap uumasorujuit qanoq atuuffeqartarsimanerat pillugit oqaluttuarissavai. Atuarnerup aappaani Mariap oqaluttuarnini nangissavaa, meeqqallu gruppinut agguataariarlutik, oqaluttuamik uumasorujummut tunngasumik allaaserinnissapput. Uumasorujummik titartaanissaq toqqarneqarsinnaavoq. Atuarnerup pingajuanni meeqqat oqaluttuaminnik imaluunniit titartakkaminnik saqqummiissapput

  • Oqalugiarneq/Workshoppertitsineq minnerpaamik sapaatip-akunnerinik marlunnik sioqqutsisumik inniminnerneqartassaaq.
  • Ilimagineqassaaq ilinniartitsisup siumoortumik gruppinik agguataarisimanissaa, taamaasilluni piffissartuutaassanani.
  • Assilissat takutinnissaanni isiginnaarut/seqertittagaq angisooq atussallugu periarfissaqassaaq.
  • Naatsorsuutigineqarpoq atuarnerup ingerlanneqarnerini tamani ilinniartitsisumik najuuttoqarnissaa.

Oqalugiaammi kalaallit oqaluttuaatitoqaanni uumasorujuit pillugit meeqqanut naleqqussakkamik soqutiginnilersitsinissaq pingaartinneqarpoq, atuartullu kulturitsinnut oqaluttuaatitsinnullu tunngasunik ilikkagaqarnissaannut periarfissinnissaat, peqatigitillugu namminneq misissuillutik ilusilersuinermik pilersitsisinnaanerat ilanngullugu.

Kalaallit oqaluttuaatitsinni uumasorujuit meeqqanut sallaatsumik eqeersaatitut naleqqussagaapput, siunertaavorlu kulturitsinnut oqaluttuaatitsinnullu annerusumik ilikkagaqarnissaat.

54 57 71
Qallunaatut, Tuluttut
Nukarliit, Akulliit, Angajulliit
Suleqatigiissitat